Хүхэ номин огторгой доро
Ханхинуур дуугаа татанaб,
Хүрьhэтэ алтан дэлхэй дээрэ
Халюун талаяа haнанаб.
Бурин Хаан баабайн хормой дээрэ
Басаган түрэжэ айлшалнаб,
Инзагата нютагай альган дээрэ
Булжамуур шубуундал жэргэнэб.
Зэдэ голой бурьялма уhанда
Аршаан болохо шүлэгүүд,
Борьё талын үргэн энгэртэ
Ая гангын ягаан сэсэгүүд.
Юртэмсэ дэлхэйн нүгөө талада
Һанаа сэдьхэлыeм гамнаарай,
Эрьехэ сагай бусаха хаhада
Гашуун нюлбаhыeм аршаарай.
12.06.2009
Хайра гансам намаяa
Зүүдэндээ харанаб, гэнэ,
Амраг гансам намаяa
Һүниндөө ооглоноб, гэнэ.
Хүрьhэтэ энэ дэлхэйн
Хоёр ондоо талада
Бидэ хоерой зүрхэн
Нэгэ дураар сохилно.
Бусахалби даа, инагни,
Шамаяа hанажал байнаб,
Мэдэнэлди даа, нүхэрни,
Сэдьхэлэй гашуун байдал.
Yнгэтэ энэ дэлхэйн
Зүүгэй хизаарта дууланаб,
Нангин дуугым инагни
Баруун хизаарта дабтана.
Ерэхэлби даа, амрагни,
Yе сагай үнгэрхэдэ,
Дуулахалди даа, инагни,
Хонгёо дуранай дуугаа.
10.05.2009
Хүнэй сэдьхэл гээшые
Хэн урид мэдэхэб,
Сагай түргэн эрьесээе
Хэн таажа шадахаб?
Нүгэл буян хоёрые
Хайшан гэжэ илгахаб,
Бурханай үгэhэн табисуурые
Яажа дабан гарахаб?
Өөхэндөө орёогдоhон бөөрэ шэнги
Ажаhууха хүн үсөөн,
Сансарын боро гүйдэлые
Дабаhан амитад үсөөн.
06.03.2009
Интернэдэй хизаарта танилсаhан
Илдамхан нүхэдэйм нэгэн,
Тунгалаг гүнзэгы ухаантай,
Эгээл дүтэ болоhон нухэрни.
Дуратайб гэхэдэм хоринош,
Yгын хүсые hануулнаш,
Энеэбхилэн, дулаан үгөөрөө
hанаа бодолым тэгшэлнэш.
Зүрхэнэйм гунигые ойлгон
Дугай байнаш заримдаа,
Бэшэhэн юyмэтэйм боосолдон
Хараанаш, зарим сагтаа.
Yнгэрhэн хүйтэн намараа
Шамтай сугтаа дабааб,
Нюycа зарим бодолоо
Гансал шамтай хубаагааб.
Yдэр бүри хүлеэнэб
Богони болоhон бэшэгүүдыш,
Бэшээгүйдэш үгылнэб,
Сүлөөтэй болохыш гуйнаб.
04.03.2009
Сагаан hарын hайндэртэ
Һанаа бодолни гэртээ,
Хун сагаан шубуудтал
Тоонто нютагаа шэртэнхэй.
Наранай гарахын урда тээ
Абамни дээжээ үргэнэ,
Сагаалагшадаа угтахаа
Эжымни буузаа шанана.
Амраг гансамни хүбүүгээ
Һэмээхэн ооглон hэргээнэ,
Ахатан зоноо золгохоо
Бэлэгээ хүхилдэн бүтээнэ.
“Мэндэ ама-aр! Сагаан hараар!”
Нарамнай баяраар угтана,
Сагаан hарын hайндэрөөр
Тоонто нютагым золгоно.
Хайрата түрэл оромни
Хабарай ерэхые угтана,
Хада уула, таламни
Ёохорой дуугаар дуудана.
Сагаан hарын hайндэртэ
hанаа бодолни гэртээ,
Хун сагаан шубуудтал
Тоонто нютагаа шэртэнхэй.
03.03.2009
Сагаан hараар! Сагаалганаар!
Шэнэ жэлэй – Амар Мэндэ!
Түрэл hайхан арад зондоо
Шэнын нэгэнэй Мэнды хүргэнэб!
Тэнюyн hайхан Буряaд Оромной
Амгалан мэндэ ажаhууг лэ,
Буурал сагаан буряад таламнай
Жаргал баяраар билтараг лэ!
Табан хушуута малаа үдхэжэ
Арад зомной баясаг лэ,
Эрдэмэй дээжые дууhан үзэжэ
Yри хүүгэднэй баярлуулаг лэ!
Эжы абанарнай үхибүүдээ суглуулан
Бууза хуушуураа шанаг лэ,
Yетэн нүхэднэй сугтаа уулзан
Ахатан зоноо золгог лэ!
Залуушуулнай ороhон жэлдээ
Бэе бэеэ ололсог лэ,
Инаг дуранай сэбэр захяагаар
Шэнэ бүлэнэр түрэг лэ!
Сагаан hараар! Сагаалганаар!
Нарамнай шэнээр мандаг лэ!
Шэнэ жэлээр! Шэнын нэгэнээр!
Тоонто нютагнай жаргаг лэ!
22.02.2009
Байдалай түргэн эрьесээдэ
Ябадал хоорондоо шатаан,
Дуратайб шамхандаa, гэжэ
Дууhан зүрхыeм абааш.
Эльгэ нимгэхэн намайе
Нарамни гэдэг hэмнэйш,
Дурлааб гэхэдэм, баhал,
Дуратайб – гэдэг бэлэйш.
Сэдьхэлдэм уярна hэмнэйш,
Уйдхарым ойлгоно бэлэйш.
Зүрхөөрни наадахаа болёoш,
Дуратайб гэжэ – мартaaш.
Зүрхөө даража hурааб,
Найдахаа дахин болёоб,
Хүрьhэтэ сэнхир талын
Боро гургалдай болооб.
Сахилзаата талын хадхуул,
Гэнэ намайеш хүнүүд,
Зүрхэнhөөм үлэhэн сог –
Мүльhэнhөө мүндэлhэн ургы.
28.01.2009
Заримдаа досоомни хооhон, заримдаа,
Зүрхэндэм гансал уйдхар шэнги.
Хэлэхэш юумэн үгы, шамхандаа,
Дуулахаш дурам хүрэнэгүй, заримдаа.
Заримдаа зүрхэм баяраар дүүрэн, заримдаа,
Байгалай долгиндол бурьялна – дуран!
Шүлэгүүд багтажа ядан, hанааем
Дүүргэн халижа гарана, заримдаа.
Заримдаа хэншье хэрэггүй, заримдаа,
Гансаараан байхада жаргал шэнги.
Заримдаа гансаартажа ядаад, шамаяа
Зүүдэндээ дуудан уйланаб, заримдаа.
25.01.2009
Дуратайлби даа, дуратайб,
Yүрэй солбондо дуратайб,
Yдэрэй дулаанда – дуратайб,
Yдэшын hэбшээдэ – дуратайб!
Дуратайлби даа, дуратайб,
Yхибүүдэй энеэхэдэ дуратайб,
Сэбэрхэн басагадуудта – дуратайб,
Залуухан хүбүүдтэ – нүгэлтэйб – дуратайб!
Дуратайлби даа, дуратайб,
Тэнюyн таладаа дуратайб,
Хүбшэ тайгадаа – дуратайб,
Тоонто нютагтаа – дуратайб!
Дуратайлби даа, дуратайб,
Буурал хүгшэдтөө дуратайб,
Хүхюyтэй хүршэдтөө – дуратайб,
Арад зондоо – дуратайб!
Дуратайлби даа, дуратайб
Юртэмсын эрьесээдэ дуратайб,
Байгаалиин гоёдо – дуратайб,
Жаргалтай наhандаа – дуратайб!
Дуратайлби даа, дуратайб
Шиниингээ нюдэдтэ дуратайб,
Дулаан гарташни – дуратайб,
Айдархан шамдаа – нүхэрни – ДУРАТАЙБ!
23.01.2009
Yглөөгүр дээжээ үргэхэдөө
Hамайгаа, амрагни, hанаарай,
Бурин Хаан баабайдаа мүргэхэдөө
Миниингээ түлөө зальбараарай.
Хүбүүгээ hургуулиhаа ерэхэдэнь
Эхынь түлөө эрхэлүүлээрэй,
Эжы абатайм уулзахадаа
Басаганайнь түлөө шэншээрэй.
Хани нүхэдтэйм уулзахадаа
Мэндыем заатагүй хүргөөрэй,
Талада малаа харюулхадаа
Дуугым дабтан дуулаарай.
Дулаан наранай шарахада
Инаг дураяа hанаарай,
Yдэшын мүшэдэй ялархада
Дуратайб гэжэ – бү мартаарай.
23.01.2009