Сахилзаата талын амисхаал
Юрөөлэй дээжэ болоно,
Дуута зүрхэнэй сохидол
Шүлэгэй мүрнүүд болоно.

Хүхэ номин тэнгэри
Сэнхир хадагаар угтана,
Тоонто нютагайм ууланууд
Ая гангаар дуудана.

Аажамхан Буряад Оромни
Алдарта зоноор суурхана,
Түрэл арадайм дуунууд
Эльгэ зүрхыем уяруулна.

11.10.2009

Хабарай hайхан hолонго
Зүүдэндэм талыем hануулна,
Ханхинуур хонгёо дуунууд
Зүрхыем дахин уяруулна.

Нажарай сэлмэг тэнгэри
Наранай шарай баярлуулна,
Түрэл арадайм дуунууд
Тахидаг уулым hануулна.

Намарай шааяма бороо
Ногоонхон тайгым hануулна,
Номгохон дайдым дуунууд
Найдаhан гансыем уяруулна.

Yбэлэй хүйтэн hүнинүүд
Саhата талыем hануулна,
Зүрхэнэйм аялга дуунууд
Айдархан гансыем уяруулна.

Yе сагай hэлгэлдээн
Сэдьхэлэйм уйдхар hануулна,
Ханилhан гансым дуран
Аглагхан зүрхыем уяруулна.

08.10.2009

Зэдэ голой сонголдо,
Инзагата нютагай басаганда —
Хаанаhаа энэ ерээб
Хэлыт намда, нүхэдүүд?

Хари газарта ерээд,
Өөрыгөө ойлгожо мэдээд,
Ухаан оробо гээшэ гүб,
Ойлгуулыт намда, үхибүүд?

Зүүдэндэм ерэнэ — зүжэгүүд!
Инаг дуранай — хүгжэмүүд!
Зүрхэндэмни — дуунууд!
Шуhандамни — шүлэгүүд!
Хаанаhаа?!?
Юyнhээ?!?

Бүмбэрсэг дэлхэй — багахан лэ,
Сахилзаата тала — арюyхан лэ,
hанаа бодолни дэлхэйе дүүргэн
Холын мүшэдтэ ниидэнэл!

Энэ юртэмсын эрьесээе
Дууhан ойлгожо болохо гү?
Хүн бүхэнэй уйдхарые
Зүрхэндөө абажа — шатаха гүб?

Зүүдэндэм ерэнэ — зүжэгүүд!
Инаг дуранай — хүгжэмүүд!
Зүрхэндэмни — дуунууд!
Шуhандамни — шүлэгүүд!
Хаанаhаа?!?
Юyнhээ?!?

09.09.2009

Хари газарhаа гэртээ харихадам
Ханилhан нүхэрни угтаха,
Хүбүүгээ тэбэрин ааляар таалахадам
Хани нүхэдни уярха.

Абынгаа гэрэй босог хүрэхэдэм
Эжымни угтан абаха,
Аба, үбгөө хоёроо тэбэрихэдэм
Аха дүүнэрни баярлаха.

Сахилзаата талым намжаа сэсэгүүд
hанаа сэдьхэлым тэгшэлхэ,
Тоонто нютагайм сэлмэг тэнгэри
Торгон хүнжэлөөр хушаха.

Эрьехэ наран дуугым шагнажа
Энеэбхилэн басагаяа шэншэхэ,
Һара мүшэдэй хонгёо шэбэнээн
Зүрхэнэйм гуниг эмшэлхэ.

07.07.2009

Одо мүшэдэй миhэлзээн
Тоонто нютагыeм hануулна,
Урдаhан мүрэнэй шэбэнээн
Залуу наhыем hануулна.

Һарын тунгалаг шарай
Аба эжыем hануулна,
Oгторгойн оёоргүй далай
Yнгэрhэн хаhыем hануулна.

Шэдитэ дэлхэйн баялиг
Буряадхан арадыем hануулна,
Сэдьхэлэйм заяа бодолнууд
Ханилhан гансыем hануулна.

23.06.2009

Хүхэ номин огторгой доро
Ханхинуур дуугаа татанaб,
Хүрьhэтэ алтан дэлхэй дээрэ
Халюун талаяа haнанаб.

Бурин Хаан баабайн хормой дээрэ
Басаган түрэжэ айлшалнаб,
Инзагата нютагай альган дээрэ
Булжамуур шубуундал жэргэнэб.

Зэдэ голой бурьялма уhанда
Аршаан болохо шүлэгүүд,
Борьё талын үргэн энгэртэ
Ая гангын ягаан сэсэгүүд.

Юртэмсэ дэлхэйн нүгөө талада
Һанаа сэдьхэлыeм гамнаарай,
Эрьехэ сагай бусаха хаhада
Гашуун нюлбаhыeм аршаарай.

12.06.2009

Хайра гансам намаяa
Зүүдэндээ харанаб, гэнэ,
Амраг гансам намаяa
Һүниндөө ооглоноб, гэнэ.

Хүрьhэтэ энэ дэлхэйн
Хоёр ондоо талада
Бидэ хоерой зүрхэн
Нэгэ дураар сохилно.

Бусахалби даа, инагни,
Шамаяа hанажал байнаб,
Мэдэнэлди даа, нүхэрни,
Сэдьхэлэй гашуун байдал.

Yнгэтэ энэ дэлхэйн
Зүүгэй хизаарта дууланаб,
Нангин дуугым инагни
Баруун хизаарта дабтана.

Ерэхэлби даа, амрагни,
Yе сагай үнгэрхэдэ,
Дуулахалди даа, инагни,
Хонгёо дуранай дуугаа.

10.05.2009

Хүнэй сэдьхэл гээшые
Хэн урид мэдэхэб,
Сагай түргэн эрьесээе
Хэн таажа шадахаб?

Нүгэл буян хоёрые
Хайшан гэжэ илгахаб,
Бурханай үгэhэн табисуурые
Яажа дабан гарахаб?

Өөхэндөө орёогдоhон бөөрэ шэнги
Ажаhууха хүн үсөөн,
Сансарын боро гүйдэлые
Дабаhан амитад үсөөн.

06.03.2009

Интернэдэй хизаарта танилсаhан
Илдамхан нүхэдэйм нэгэн,
Тунгалаг гүнзэгы ухаантай,
Эгээл дүтэ болоhон нухэрни.

Дуратайб гэхэдэм хоринош,
Yгын хүсые hануулнаш,
Энеэбхилэн, дулаан үгөөрөө
hанаа бодолым тэгшэлнэш.

Зүрхэнэйм гунигые ойлгон
Дугай байнаш заримдаа,
Бэшэhэн юyмэтэйм боосолдон
Хараанаш, зарим сагтаа.

Yнгэрhэн хүйтэн намараа
Шамтай сугтаа дабааб,
Нюycа зарим бодолоо
Гансал шамтай хубаагааб.

Yдэр бүри хүлеэнэб
Богони болоhон бэшэгүүдыш,
Бэшээгүйдэш үгылнэб,
Сүлөөтэй болохыш гуйнаб.

04.03.2009

Сагаан hарын hайндэртэ
Һанаа бодолни гэртээ,
Хун сагаан шубуудтал
Тоонто нютагаа шэртэнхэй.

Наранай гарахын урда тээ
Абамни дээжээ үргэнэ,
Сагаалагшадаа угтахаа
Эжымни буузаа шанана.

Амраг гансамни хүбүүгээ
Һэмээхэн ооглон hэргээнэ,
Ахатан зоноо золгохоо
Бэлэгээ хүхилдэн бүтээнэ.

«Мэндэ ама-aр! Сагаан hараар!»
Нарамнай баяраар угтана,
Сагаан hарын hайндэрөөр
Тоонто нютагым золгоно.

Хайрата түрэл оромни
Хабарай ерэхые угтана,
Хада уула, таламни
Ёохорой дуугаар дуудана.

Сагаан hарын hайндэртэ
hанаа бодолни гэртээ,
Хун сагаан шубуудтал
Тоонто нютагаа шэртэнхэй.

03.03.2009