Инзагата – альган дээрэш
Арад зомни жаргалаа олоо,
Yри хүүгэдшни дэлхэй дүүрэн
Шамайгаа магтан дуугаа дуулаа.

Бурин Хаан баабайн үндэр нэрые
Магтан дуулаа хүбүүдшни,
Эгээл түрүүшынгээ шүлэгүүдые
Зорюулан бэшээ басагадуудшни.

Тоонто нютагни – зүрхэнэйм аялга
Инаг дуранайм булган үлгы,
Инзагатамни – шүлэгүүдэйм дээжэ
Энэ наhанайм – мүнхэ зула.

25.12.2008

Эхын зүрхэн – хэзээш мүнхэ,
Yриин зүрхэн – шулуун мэтэ,
Эрын зүрхэн – булад мэтэ,
Cугтаa – минии гэгээн бүлэ.

Хаанаш яба – ходол шамтай,
Хани нүхэрэйш инаг дуран,
Yри хүүгэдэйш халуун этигэл,
Эжы абын захяа мэдэрэл.

Yлгы тоонтын хангал мүнхэ,
Уужам талын бүргэд мэтэ,
Дуунай шэнжээ шубуун мэтэ,
Дуулан байна – зүрхэндэмнэй.

22.12.2008

Хари холын газарта
Гансаартажа ядахадаа,
Байдалаа дүүрэн хөөрэхыем
Xайра гансам хүлисөөрэй.

Зүүгэй холын хизаарта
Зулгы дайдаяа hанажа,
Зүрхөө шатаан уйлахыeм
Tүрэл арадни хүлисөөрэй.

Сагай бэрхэ эрьесээдэ
Хаян шамайгаа ябахыем,
Ойлгон намайгаа хүбүүмни
Yнэн зүрхэнhөө хүлисөөрэй.

22.12.2008

Зуугаадхан жэлэй саанахана
Гэгээтэйн элдин талада
Малша Цэрэнэй Лодой хүбүүн
Гүнзэнэй Eши-Гэндэн басагатай
Хуби заяагаа ниилүүлжэ,
Айл боложо гэрлэбэ ха.
Эжы абын альганда
Гурбан эгэшээ дагаhан,
Лодойн гансахан хүбүүхэн,
Отхон Гасурун түрэбэ.
Сагшье түргэн хиидэбэ,
Шанга жэлнүүдш ерэбэ,
Дүрбэн үхибүүдээ дахуулан
Тасархай нютагта мордобо.
Хорёодхон наhаяа наhалжа
Гасурун – гансахан хүбүүниинь,
Бургалтайhаа буужа ерэhэн
Цэбэгжабэй Гэлэг-Ёндон Жигмэд хоёрой
Дүрбэн хүүгэдэй гансахан басаганда
Yнэн зүрхэнhөө дурлажа,
Хуби заяагаа ниилүүлбэ.
Yе сагай hалхинда
Гурбан хүбүүдээ дахуулжа
Бурин-Хаан хадын хормойдо,
Инзагата нютагта бууба ха.
Аажамхан энэ нютагтаа
Юhэн хүүгэдтэй болобо,
Бултыень ганзагадань хүргөөжэ
Аша гушанараа харюулна.
Эгээл түрүүшынь хүбүүн
Жолоошон наhаараа ябаhан,
Таа бүгэдтэ хөөрэhэн
Миниитнэй эсэгэ болоно.
Алтанхан энэ дэлхэй дээрэ
Наран шэнги толоржо,
Номгохон, даруухан зантай
Энеэжэл ябадаг – эжымни.
Баян дэлгэр Агада,
Сагаан Уула нютагта,
Хонишон гансахан эжынгээ
Эльгэниинь болоhон басаган лэ.
Хүдөө ажахын инститүүдтэ
Эрхим экономист боложо,
Абым тэнжэhэн нютагта
Бухгалтер боложо ерэhэн юм.
Сэнхир номин огторгой доро
Бэе бэеэ ололсожо,
Инаг дуранай заxяагаар
Зүрхэ сэдьхэлээ ниилүүлhэн юм.
Инзагата нютагтаа жаргажа,
Зургаан хүүгэдтэй болобо,
Эгээл түрүүшын намаяа
Найдал гэжэ нэрлэбэ.
Арбанхан зургаа хүрэжэ,
Хадамда гаража ябабаб,
Ханилhан гансахан нүхэртөө
Хүбүү түрэжэ үгэбэб.
Аглагхан энэ дэлхэй дээрэ
Бимбахан хүбүүгээ харюулжа,
Амрагхан элдин тоонтодоо
Таанадай дунда ажаhуунаб.

06.03.1998